اليانس والكاب والستري..

كتب جهاد التكروري : ” معظمنا أو حتى كل الدنيا بتسمي نابلس دمشق الصغرى ومن بعض الاشياء التي بشبهوا نابلس بالشام غير العادات والتقاليد والطبيخ واللهجة ..ملابس الرجال والنسوان ..والي بنشوفوا بالمسلسلات السوريه التاريخيه كان بالفعل موجود عنا بفترة الأربعينات والخمسينات ..ومنها لبس جداتنا وأمهاتنا المكون من اليانس أو الملاية والكاب أو الستري..
واليانس أو الملاية كان عبارة عن طبقتين الاولى بتغطي كل الوجه والتانية غطا خفيف وشفاف عشان يقدروا يشوفوا من خلاله وهو كمان حماية اذا طارت الطبقة الأولى أو انكشفت لأي سبب كان بتكون الطبقة التحتا حماية من أنه ينكشف اي شي من الوجه ..
وغير الملاية كمان الكاب أو متل ما كانوا يسموه الستري(يعني الي بستر الجسم )وضل هاللبس موجود حتى أواخر السبعينات..
وضل موجود وانتهى من وفاة اي ست نابلسية كانت تلبسوه وتغير اللبس كله ولحق الاشياء الحديثة من فساتين وتنانير وصار ينكشف الوجه على أقل تقدير هدا غير الفساتين لعند الركبة او فوقها بشوية ..
وبالصوره المرفقة بتبين الخلط بين القديم والحديث والبدء بلبس الفساتين وكمان ظاهر بالصورة لبس الرجال من القمباز أو اللبس العربي بأواخره..
حلوة يا نابلس بكل أحوالك وأوضاعك ورجالك ونساءك والله يحميكي بكل الاوقات والأزمان ..”